Prishtinë, 18.05.2012

Në kuadër të “Ditëve të Universitetit AAB 2012”, në këtë universitet u mbajt një manifestim kushtuar veprimtarisë letrare dhe politike të heroit tonë kombëtar, z. Adem Demaçi.

Manifestimi filloi me interpretimin e aktorit Çun Lajçi të një poezie të shkruar nga Adem Demaçi. Më pas fjalën e mori Rektori i Universitetit AAB, Lulëzim Tafa, i cili tha se në historinë moderne shqiptare, në rrugëtimin e Kosovës drejt lirisë dhe pavarësisë, emri i Adem Demaçit është i pakrahasueshëm.

“Me angazhimin, me punën e tij të palodhshme, me sakrificën e tij, ai u bë simbol i rezistencës tonë për liri e pavarësi, u bë zë i fuqishëm i mos nënshtrimit tonë, u bë kurora e luftës së popullit të Kosovës për liri e shtet demokratik. Adem Demaçin, sot bota e njeh edhe si Mandela i Evropës”, tha rektori Tafa.

Ai tha se janë të paharruara fjalët që i tha kur doli nga burgu se “unë dola nga një burg i vogël e tash jam në një burg më të madh që quhet Kosovë e ku e vuajnë dënimin dy milionë shqiptarë”.

“Me sakrificën e tij edhe evropa edhe bota është ndërgjegjësuar më shumë. Përveç si veprimtar politik Adem Demaçi ka lënë gjurmë të thella edhe në letërsinë shqipe. Romani emblematik “Gjarprinjtë e gjakut” i shkruar para 55 vjetësh sot numërohet ndër romanet më të mira të autorëve shqiptarë”, tha rektori i Universitetit AAB, Lulëzim Tafa.

Shkrimtari dhe studiuesi, Agim Vinca, në fjalën e tij tha se Adem Demaçi është njeriu i cili tërë jetën ia kushtojë luftës për liri të popullit të vet nga zgjedha e huaj. Ai tha se Adem Demaçi njihet jo vetëm si veprimtar i shquar politik,  por edhe krijues letrar, shkrimtar me talent të rrallë dhe me mundësi të mëdha krijuese.

“Në librin “Dosja Demaçi” të historianit Hakif Bajrami, në njërën nga deklaratat e deponuara kundër autorit të “Gjarprinjëve të gjakut” në vitin 1958, fatkeqësisht nga kolegët e tij shkrimtarë, haset ndër të tjera edhe kjo fjali: “Në mesin e shkrimtarëve të Kosmetit, (kështu thuhej atëherë), konsiderohet shkrimtari më i talentuar.

Nuk me kishte shkuar mendja se edhe në dosjet policore mund të gjenden mendime me vlerë për historinë e letërsisë”, tha Vinca.

Ai tha se veprat e Adem Demaçit shquhen për gjetjen e temave dhe personazheve interesante, për personazhet pikante dhe në aftësimet psikologjike, për gjuhën e gjallë e autentike, për ndjenjën e humorit dhe vlerat e tjera që i bëjnë ato modele të tregimit të shkurtër dhe si të tilla tërheqin edhe sot vëmendjen e lexuesit.

Më pas, këngëtari Hysni Klinaku, nën tingujt e pianistit Misbah Kaçamaku, këndoi një këngë epike “Hej ju male” nga kompozitori i njohur Çesk Zadeja.

Studiuesi Hysen Matoshi, në fjalimin e tij për Adem Demaçin, të cilin e quan “Marathenomaku i shqiptarisë”, dhe tani pas gjysmë shekulli që kur Adem Demaçi i është përkushtuar çështjes së pazgjidhur shqiptare, gjysmën e kohës së veprimtarisë së tij, e ka kaluar përtej grillave.

“Jo rrallë në pikëpamjet e tij ka qenë pothuajse i vetmuar. Dënimet gjyqësore, anatemimet politike, ekskomunikimet letrare e intelektuale nuk e kanë dëshpëruar dhe nuk kanë ndikuar që të shmanget nga rruga e tij jetësore”, tha Matoshi.

Më pas, aktori Çun Lajçi, nën tingujt e pianistit Misbah Kaçamaku, vazhdoi interpretimin e poezisë “Shkrumnajë e dashuni” të shkrimtarit Adem Demaçi.

Soprano e njohur kosovare, Sanije Matoshi, interpretoi këngën “Margjelo”, të Prenk Jakovës.

Ndërkaq shkrimtari dhe aktivisti politik, Heroi i Kombit shqiptar, Adem Demaçi, në fjalimin e tij para studentëve të Universitetit AAB, tha që jetën e tyre duhet ta investojnë aty ku ajo jetë nuk do të vdesë kurrë, do të qëndrojë gjithmonë.

“Ta investoni dijen tuaj, mundin tuaj, vetveten tuaj duhet ta investoni për kombin, sepse vetëm kombi është i pavdekshëm”, u tha Demaçi studentëve të Universitetit AAB.

Ai tha se kombi përbëhet nga individët, por kombi nuk vdes, ndërsa individët vdesin.

“Ata që lanë pas vetës së tyre një vepër çfarëdo qoftë, e vogël ose e madhe nuk do të vdesin kurrë, por ata do të ndërrojnë jetë. Do të vazhdojnë të jetojnë me atë vepër të tyre deri sa të jetë kombi shqiptar”, u shpreh Demaçi.

Ai falënderoi drejtuesit e Universitetit AAB për këtë nderim që i është bërë dhe porositi studentët që të punojnë shumë, të shfrytëzojnë çdo ditë që t’i zgjerojnë horizontet e dijes dhe të arrijnë të jenë të suksesshëm në jetën e tyre. /Sabri Musliu

Prishtinë, 17.05.2012

Në kuadër të “Ditëve të Universitetit AAB 2012”, janë zgjedhur dy projektet më të mira në gazetari audio të studentëve të Fakultetit të  Komunikimit Masiv dhe Gazetarisë.

Komisioni i përbërë nga Rrahman Paçarizi, Hyrë Tejeci dhe Hasan Saliu, vendosën që të shpërblehen: reportazhi “Keqpërdorimi  i lëmoshës”, të cilën e kanë bërë studentet Adelina Hasani, Paulina Nushi  dhe kronika “Cilësia e futbollit”, të përgatitur nga studentët Fatos Mustafa, Erblin Krasniqi dhe Andi Shabani.

Komisioni që bëri përzgjedhjen e projekteve fituese, thanë se e patën të vështirë të përzgjidhnin punimet më të mira, pasi që sipas tyre, të gjitha punimet ishin shumë profesionale.

Reportazhi “Keqpërdorimi  i lëmoshës”, ka të bëjë me rastet e sëmundjeve të rënda të cilat kërkojnë trajtim jashtë vendit. Kjo temë trajton më shumë aksionet e njerëzve apo shoqatave të cilat dalin në terrene për të kërkuar ndihme për ndonjë rast me sëmundje të rëndë. Sipas studenteve, jo të gjitha këto raste kanë nevojë për ndihmë.

Ndërsa kronika “Cilësia e futbollit”, e cila u cilësua një nga dy më të mirat, flet për cilësitë e futbollit në Kosovë. Studentët Erblin Krasniqi, Andi Shabani dhe Fatos Mustafa, të cilët e kanë bërë këtë temë hulumtuese, thanë se në bazë të hulumtimit të tyre, ka rezultuar se referimi dhe disiplina në fushë mbeten problemet kryesore në futbollin kosovar.

Profesori i Radio-gazetarisë, i cili ishte edhe në juri, Rrahman Paçarizi, tha se nga aspekti përmbajtësor dhe realizimi teknik, të gjitha projektet konkurruese kanë qenë profesionale, ndërsa sa i përket projekteve të cilat janë përzgjedhur më të mirat, në konkurrencë janë të barabarta.

Asistentja e lëndës së Radio-gazetarisë në Universitetin AAB, Hyra Tejeci, për konkurrencën e studentëve tha se ka qenë mjaft e kënaqur, por sipas saj, dy punime e përzgjedhura si më të mirat, kanë shkuar të barabarta në garë.

Në konkursin për zgjedhjen e projektit më të mirë të gazetarisë audio kanë konkurruar edhe dy projekte të tjera, të cilat janë kronika “Ligji i Punës”, përgatitur nga Valbona Rama, Majlinda Llapashtica dhe  kronika “Testi i maturës”, përgatitur nga Zejnepe Bekteshi dhe Egzona Gjinovci.

Ndarja e çmimeve për temat audio që janë zgjedhur më të mirat do të bëhet në ditën përmbyllëse të “Ditëve të Universitetit AAB”, me datë 5 qershor. /Laureta Gashi
 

Prishtinë, 17.05.2012

Në kuadër të manifestimit “Ditët e Universitetit AAB”, u prezantuan publikisht punimet më të suksesshme të studentëve për vitin akademik 2011/2012 të përzgjedhura nga komisionet vlerësuese.

Studentët e Fakultetit Ekonomik prezantuan 7 punime.

Prezantimi i parë ishte “Gjuha ime (digjitalizimi i Abetares)” e punuar nga studenti Besart Gërguri. Punimet tjera që u prezantuan sot ishin edhe “Plani i marketingut  - Gueda Invest" nga studentja Fazile Qerimi, dega në Ferizaj;  "Përpilimi i planit të biznesit Wellness-Center” nga Ilir Kaleshi; punimi “Përpilimi i planit të biznesit të përfaqësisë MCDonald’, nga studentja Nita Ferati; studentja Besarta Haziri prezantoi punimin “Figura emblematike Malcolm X-in dhe veçoritë e lidershipit të tij”;  “Cilësitë e Lidershipit të William Jefferson Clinton” u prezantua nga studenti Liridon Bllaca dhe punimi "Na ishte një herë Gjakova industriale, tani a ka shpresë ekonomike...?” e punuar nga studentja Myrvete Krasniqi, dega në Gjakovë.

Të gjitha punimet ishin projekte hulumtuese të realizuara nga studentët në lëndët përkatëse të cilat u kanë shërbyer për vlerësim në provime.

Komisioni Vlerësues përbëhej nga Dr.Sc.Shaip Bytyqi, Ma.Ylber Prekazi, Ma.Kosovare Ukshini, Kaltrina Osmani dhe Zgjim Gashi të cilët i vlerësuan 3 punimet më të mira, punimi i parë nga studenti Besart Gërguri, punimi i dytë nga studentja Besarta Haziri dhe punimi i tretë nga Fazile Qerimi.

Ndërkaq studentët e Fakultetit Juridik në kuadër të lëndës “Praktikë Juridike II” në sallën e gjykatës në AAB prezantuan simulim të seancës gjyqësore.

Seanca kishte të bëjë me veprën penale grabitje të cilën  studentët e vitit të dytë e realizuan me sukses.

Këto prezantime u bënë para një publiku të konsiderueshëm, rektorit të Universitetit AAB, Lulëzim Tafa dhe para komisionit vlerësues: Prof.Dr.Muhamet Kelmendi, Driton Muharremi, PhD Cand, dhe Fatmir Çollakaj, Phd Cand.

Prishtinë, 16.05.2012

Në Universitetin AAB sot ka filluar manifestimi më i madh universitar në Kosovë, “Ditët e Universitetit  AAB 2012”.

Manifestimi tradicional “Ditët e Universitetit AAB 2012”, organizohet tradicionalisht për vite me radhë, i cili përcillet me shumë aktivitete në të cilat do të prezantohen vlerat që kultivohen në këtë universitet. Çdo ditë gjatë një jave sa do të zgjasë ky manifestim, do të ketë aktivitete të ndryshme.

Hapjen e këtij manifestimi tradicional e bëri rektori i Universitetit AAB, Lulëzim Tafa, i cili foli mbi historikun e universitetit dhe mundësitë që ofron ky institucion i lartë arsimore.

“Atëherë me emrin Akademia e Arteve të Bukura, Universiteti AAB ishte institucioni i parë i themeluar nga iniciativa private, duke thyer kështu kushtet e monopolizmit që kishte Kosova në fushën e arsimit”, tha me këtë rast rektori Tafa.

Ai tha se Universiteti AAB sot ka 25 programe të akredituara dhe të vlerësuara nga ekspert eminent ndërkombëtarë të angazhuar nga Agjencia Kosovare e Akreditimit, duke shtuar se në Universitetin AAB sot studiojnë rreth 10 000 studentë të shpërndarë nëpër programe të ndryshme.

Diplomat e këtij universiteti, sipas rektorit Tafa, sot gëzojnë një reputacion  të madh në tregun e punës.

“Mbi 70 për qind e të diplomuarve tanë kanë zënë vendet e tyre të punës dhe japin kontributin e tyre  profesional në ato vende ku janë duke punuar”, tha Tafa, duke shtuar se ky është qëllimi përfundimtarë i secilit Universitet.

Rektori Tafa theksoi se Universiteti AAB-Riinvest është një nga universitetet më të mëdha nga sektori i arsimit jo publik jo vetëm në Kosovë, por edhe nga të gjitha vendet e rajonit, duke u shndërruar kështu në një pikë reference dhe universitet model edhe për shumë universitete tjera.

“Ne jemi duke i ndërtuar edhe kampuset tona në Ferizaj dhe Gjakovë në mënyrë që standardet e arritura në qendër në Prishtinë, t’i bartim edhe në këto degë. Ndërtimi i këtyre objekteve që gjenden në strategjinë e Universitetit tonë, mbase do ta shënojnë edhe rrumbullaksimin e investimit më të madh në Kosovën e pasluftës në fushën e arsimit, duke përfshirë edhe sektorin publik”, theksoi ndër të tjera Tafa.

Në hapjen zyrtare të këtyre aktiviteteve u shfaq edhe një ekspozitë vjetore e studentëve të arteve.

Profesori në Fakultetin e Arteve, Shyqeri Nimani, tha se në këtë ekspozitë të studentëve të vitit të parë të Dizajnit Grafik dhe të Arkitekturës, paraqiten punimet të përzgjedhura me një rigorezitet, e që tregojnë se studentët që në vitin e parë kanë një vullnet të jashtëzakonshëm, duke na bërë gjeneratat e vjetra të jenë të kënaqur që do të  zëvendësohen nga gjeneratat e reja.

“Kjo ekspozitë e këtyre studentëve kaq ambicioz do të na bëjë të ndihemi krenarë, prandaj unë ju uroj që të keni kënaqësinë që ta vizitoni këtë ekspozitë dhe të jeni të impresionuar nga këta talentë të rinj”, theksoi profesori Nimani.

E ftuar speciale në këtë manifestim ishte edhe raportuesja për Kosovën në Pralamentin Europian, Ulrike Lunacek, e cila për shkak të agjendës së saj të ngjeshur nuk mundi të ishte e pranishme.

Mirëpo Lunacek me anë të një video-mesazhi, falenderoi për ftesën që iu është bërë nga Universiteti AAB, duke thënë se arsimi është rruga më e sigurtë e integrimit të Kosovës në Bashkimin Evropian.

Në ditën e fundit të këtyre aktiviteteve do të ndahen çmimet për studentët e dalluar. Më pas vendi do t'i lihet sportit me mbajtjen e finaleve në street ball, ping-pong, futboll dhe volejboll si dhe do të ndahen mirënjohje për ata që kontribuuan në këtë manifestim. /Jehona Rexhaj

Prishtinë, 16.05.2012

Skuadra fituese e turnirit të organizuar nga Universiteti AAB, që zgjati tri ditë rresht, është “Bylmeti” që e përfaqëson shkollën e mesme të Bujqësisë në Prishtinë.

Kjo skuadër në finale e mundi skuadrën “Ma të fortit”, që e përfaqësuan shkollën e mesme, Gjimnazin “Xhevdet Doda”, me rezultat 3:0.

Universiteti AAB, organizues i këtij turniri u dhuroi fituesve nga një medalje, Kupën dhe nga një lap-top, të cilët ua shpërndau Rektori i këtij universiteti, Lulëzim Tafa dhe zv/rektori, Shemsedin Vehapi.

Organizator të këtij turni, maturantët Fatos Zogiani dhe Uran Kika ishin shumë të kënaqur sepse morën pjesë maturantët e shkollave te mesme nga të gjitha qytetet e Kosovës.

Ata njëherësh thanë se ky turnir ishte më i madhi në vend dhe se e falënderojnë Universitetin AAB që ka organizuar këtë turnir, duke i stimuluar kampionin dhe nënkampionin e këtij turniri.

Lojtarët ë dy skuadrave finaliste janë:

Nga skuadra “Bylmeti”, kampionit të këtij turniri të cilët përfaqësuan shkollën e mesme të bujqësisë janë: Arbër Reçica, Mujë Zogiani, Labinot Reçica, Gentrit Dumani, Granit Statovci dhe Arben Berisha.

Nga skuadra “Ma të fortit”, nënkampion i këtij turniri të cilët përfaqësuan shkollën e mesme, Gjinmazin “Xhevdet Doda” janë: Taulant Rusinovci, Lorik Shabani, Muhamet Gashi, Gent Shabani, Berat Hamiti dhe Yll Hyseni.

Futbollisti më i mirë i këtij turniri u zgjodh lojtari i skuadrës “Bylmeti”, Arben Reçica.

Pro-dekani i Fakultetit të Edukatës Fizike në Universitetin AAB, Zenel Metaj, është shprehur të jetë i kënaqur me diciplinën e maturantëve të shkollave të mesme të qyteteve të Kosovës. Ai tha se e kanë befasuar me një diciplinë dhe me një pjekuri të madhe.

Të gjitha skuadrat pjesëmarrëse ishin të kënaqur me kushtet e Universitetit AAB dhe me atmosferën që mbretëronte në sallën sportive të këtij universiteti, në të cilën u zhvilluan të gjitha lojët dhe u përcollën me komentim ‘live”. /Adem Haliti

Prishtinë, 11.05.2012

Para studentëve të Universitetit AAB, ministrja e Integrimeve Evropiane, Vlora Çitaku, mbajti një ligjëratë me temën "Kosova në Procesin e Integrimit Evropian".

Pos studentëve të Fakultetit për Integrime Evropiane, dhe të degëve të tjera në Universitetin AAB, në këtë ligjeratë, e cila ishte e hapur edhe për mediat, të pranishëm ishin edhe drejtues të këtij universiteti.

Ministrja Çitaku e filloi ligjëratën duke thënë se “jo më larg se dje, unë ka pasur disa pyetje parlamentare në Kuvendin e Kosovës dhe kam qenë lart në podium. Po ju siguroj se pamja që kam sot përpara është shumë më e bukur dhe shumë më e mirë se sa ajo që kisha në kuvend”.

Gjatë ligjëratës së saj, ajo tha se në Kosovë nuk ka euro-skeptik, se nuk ka grupe formale, qofshin politike apo shoqërore të cilat refuzojnë, bllokojnë apo pengojnë integrimin e Kosovës në familjen evropiane.

“Kam mbështetjen e të gjitha partive opozitare pa përjashtim dhe siç keni mundur të vini re, para pak kohësh, presidentja e Kosovës, Atifete Jahjaga, ka themeluar Këshillin Kombëtar për Integrime Evropiane, pjesë e së cilës janë të gjitha partitë politike, shoqëria civile, mediat, komuniteti i biznesit, komuniteti akademik, e kështu më radhë”, tha ministrja Çitaku.

Ajo tha se integrimi i Kosovës në BE nuk është dhe nuk do të jetë produkt negocimi.

“Ne nuk do të mund t’ua mbushim mendjen as komisionerëve në Bruksel e as vendeve anëtare me fjalime të bukura dhe me deklarata retorike. Integrimi evropian i Kosovës nuk është proces i jashtëm, nuk është politikë e jashtme. Integrimi evropian është dinamikë e brendshme. Është një listë detyrash është një model shtet-formimi të cilën e kemi zgjedhur ne për vendin tonë. Nëse ne do të arrijmë ta ruajmë momentumin, ta mbajmë ritmin, do të mund të prodhojmë argumente për partnerët tanë dhe t’i lëmë pa argumente oponentët e integrimit evropian të Kosovës”, tha Çitaku.

Ministrja Çitaku tha se Evropa e vitit 2012 përballet me shumë sfida. Sipas saj, e para është kriza financiare, e dyta është problemi i imigracionit ilegal dhe këto dy procese të cilat zhvillohen shkëputur nga konteksti i integrimit evropian të Kosovës, kanë refleksionet e tyre ndaj Kosovës.

“Studimi i Fizibilitetit është hapi i parë në rrugën e Kosovës drejt integrimit evropian. Kosova ka shënuar progres në katër blloqet, (sigurimi i dokumenteve, menaxhimi i integruar i kufijve, fushën e rendit dhe ligji dhe të drejtat e minoriteteve), të cilat i kërkon Bashkimi Evropian për të marrë udhërrëfyesin për liberalizimin e vizave”, vlerësoi ministrja e Integrimit Evropian, Vlora Çitaku.

Ministrja Çitaku, pas përfundimit të ligjëratës së saj, iu përgjigj edhe pyetjeve të studentëve të Universitetit AAB. /Sabri Musliu
 

Prishtinë, 10.05.2012

Në Qendrën mediale në Universitetin AAB u mbajt një prezantim me temën “Trendet dhe Zhvillimet në Ambientin e Bibliotekave Globale”, të cilin program e prezantoi drejtori menaxhues i Qendrës Kompjuterike të Bibliotekave Online (OCLC – Online Computer Library Center), Dr. Rein Van Charldrop.

Në këtë prezantim, përpos stafit të bibliotekës së Universitetit AAB dhe mediave, të pranishëm ishin edhe përfaqësues të bibliotekave lokale në Kosovë.

OCLC është shënimi më i madh bibliotekar dhe organizatë hulumtuese në botë e cila ka krijuar databazën më të madhe të bibliotekave - WorldCat, e cila sivjet shënon 45 vjetorin e themelimit. Gjatë këtyre 45 vjetëve kjo organizatë ka krijuar më shumë se 260 milionë regjistrime dhe mbi 1,7 miliard njësi bibliografike.

Momentalisht mbi 72 000 biblioteka nga mbarë bota janë anëtarë të OCLC, nga 170 shtete të ndryshme me regjistrime me mbi 460 gjuhë të ndryshme të botës.

Në gjuhën shqipe, në OCLC momentalisht janë 35 273 regjistrime, ndërsa nga ato janë 26 281 libra të botuar në Shqipëri, shumica nga të cilat janë në gjuhën shqipe.

Në OCLC nuk mund të anëtarësohen personat si individë, por vetëm përmes bibliotekës së tyre, ata mund të kenë qasje në produktet që ofron OCLC-ja.

Nëse një bibliotekë regjistrohet në OCLC, mund të kontribuojë me regjistrime të ndryshme të librave apo punimeve të ndryshme, e më këtë, regjistrimet e tyre do të mund të kenë qasje nga e gjithë bota, varësisht nga produktet që i kërkojnë ata.

Të gjitë ata që kërkojnë burime shkencore apo literaturë të ndryshme për punimet e tyre, për të pasur qasje në OCLC mund të klikojnë në këtë link: www.oclc.org  dhe këtu mund të gjejnë artikujt që ju nevojitën. /Sabri Musliu

Prishtinë, 08.05.2012

Fitueset e Kupës së Kosovës në Volejboll, vajzat e KV "Universiteti AAB" dje në mesditë ia dorëzuan trofeun e fituar kryeministrit të Kosovës, Hashim Thaçit.

Me rastin e vizitës, kryeministri Thaçi uroi volejbollistet për trofeun e fituar, njëherësh edhe për vizitën e tyre në qeveri.

Kapitenja e KV "Universiteti AAB", Shqipe Kçiku, pasi i dorëzoi kryeministrit Kupën e Kosovës, i shprehu falenderim kreut të qeverisë për pritjen dhe për përkrahjen e mëtejme për volejbollistet e këtij klubi.

Bashkë me volejbollistet e KV "Universiteti AAB", ishin edhe rektori i Universitetit AAB, Lulëzim Tafa, trajneri i klubit, Naser Krasniqi dhe stafi i klubit të Universitetit AAB.

Volejbollistet e Universitetit AAB, në finalen e Kupës së Kosovës në Volejboll, në konkurrencën e femrave, që ishte zhvilluar në Pallatin e Rinisë dhe Sporteve, në palestrën “Adem Jashari”, në një atmosferë fantastike ku salla ishte e stërmbushur, patën mposhtur KV Prishtinën me rezultat 3:2 në sete. /KNN

Prishtinë, 03.05.2012

Në finalen e Kupës së Kosovës në Volejboll, në konkurrencën e femrave, që u zhvillua në Pallatin e Rinisë dhe Sporteve, në palestrën “Adem Jashari”, në një atmosferë fantastike ku salla ishte e stërmbushur, vajzat e Universitetit AAB mposhten klubin e volejbollit Prishtina me rezultat 3:2 në sete.

Seti i parë u takoi volejbollisteve të Universitetit AAB, të cilat e fituan ndaj atyre të Prishtinës me rezultat 25:20. Në setin e dytë rikthehen volejbollistet e Prishtinës duke i mposhtur ato të AAB-së me rezultat 25:17. Në setin e tretë, volejbollistet e Universitetit AAB rikthehen me fitore prej 25:20. Në setin e katërt, u rikthyen prapë vashat e Prishtinës, duke e fituar me rezultat 25:16.

Seti i fundit ishte ‘triller’ i vërtetë, sepse luhej deri ne 15 pikë. Vajzat e AAB-së me një lojë të shkëlqyeshme taktike dhe tejet të koncentruar psiqikisht, mundin skuadrën e Prishtinës me rezultat 15:11.

Kjo fitore e klubit volejbollistik të Universitetit AAB edhe një herë dëshmon se është skuadra më e fuqishme në vend, duke fituar radhazi Kupën e Kosovës.

Pas përfundimit të ndeshjes, kapitenia e KV Universiteti AAB, Shqipe Kqiku, tha se është tepër e lumtur që kanë arritur të mbrojnë titullin e kampionit.

“Ishte një lojë tepër e fortë dhe me taktikë e koncentrike në arritëm ta mposhtim skuadrën e Prishtinës. Nuk mund t’i përshkruaj ndjenjat e mia si lidere e ekipit, sepse është ndjenja më e veçantë që e çoj në Universitetin AAB edhe një Kupë të finales së Kosovës”, u shpreh kapitenia e KV Universiteti AAB,  Shqipe Kqiku. /Adam Haliti

Me rastin e ditës botërore të “Lirisë së Medias” në Universitetin AAB  u mbajt një debat me temën “Liria e medias dhe Rregullativa Ligjore në Kosovë”. Këtë debat të cilin e drejtoi dekani i Fakultetit të Komunikimit Masiv në Universitetin AAB, Hasan Saliu, ishin të pranishëm panelistë nga fusha e medias, politika, shoqëria civile dhe studentë të gazetarisë në Universitetin AAB.

Rektori i Universitetit AAB, Lulëzim Tafa, në fjalën e tij tha se konsideron se në një vend të lirë dhe demokratik, çfarë është vendi ynë, aq sa ka nevojë për një media të lirë dhe të pavarur, poashtu ka aq nevojë për një rregullativë ligjore efikase që siguron punën e medias edhe ne rastet kur mund të kryhen disa vepra penale edhe me anë të medias të cilat i ka paraparë Kodi Penal i Kosovës.

Në fjalën e tij, dekani Hasan Saliu nuk u ndal vetëm në kategorinë e shpifjes dhe fyerjes, por sipas tij, media ka një varg tjetër mekanizmash dhe faktorësh të cilët ndikojnë që mediat më shumë se transparencë dhe kritikë të realitetit, të prodhojë fshehjen dhe ruajtjen e status-quosë?

“Sot televizionet, duke mbetur gjeneraliste dhe mjaft të kufizuara në numër në Kosovë, bëjnë kompromise të tjera në dëm të cilësisë së produktit televiziv dhe në dobi të rritjes së shikueshmërisë. Drejtuesit e sotëm të televizionit nuk janë gjë tjetër përveçse peng të audimatit, ndërsa audimati nuk është tregues i cilësisë.   E televizionet fshehin duke treguar. Ato tregojnë diçka të parëndësishme me qëllim që të fshehin diçka të rëndësishme”, vlerësoi dekani Saliu.

Margarita Kadriu, botuese e gazetës Kosova Sot, shtroi problemin e qasjes në dokumentet zyrtare.

“Ne kemi me dhjetëra kërkesa, mos të them se ndoshta ka arritur edhe te numri 100, ku prej nivelit komunal deri te niveli qendror, institucionet nuk kthejnë përgjigje. Si do të informohen qytetarët e Kosovës për fondet publike, nëse jo përmes mediave?”, tha Kadriu.

Arben Gashi nga Komisioni për Legjislacion i Kuvendit të Kosovës, tha se liria e përgjegjësisë penale edhe të personave juridik ku në këtë rast përfshihen edhe mediat, nëse nuk rregullohet me Kodin Penal  ashtu si është paraparë, rregullohet me përgjegjësinë penale të personave juridik. Kjo sipas tij, është në dëm të interesit të mediave.

Ndërkaq, Arben Ahmeti nga Asociacioni i Gazetarëve Profesionist të Kosovës (AGPK), tha se me Kodin Penal kanë vendos nene shtesë, të cilat veç janë të rregulluara me ligj.

“ Duke bërë nene shtesë, duke bërë ligje shtesë, nuk e kanë qëllimin t’i kënaqin gazetarët, por qëllimi është që të kufizohen sa më shumë gazetarët”, vlerësoi Ahmeti.

Ai tha se çdo duplifikim i ligjeve, i lë më shumë mundësi keq-interpretimit dhe më shumë dërgimit të gazetarëve nëpër burgje. /Sabri Musliu

Numri i madh i studentëve të interesuar për të studiuar në Universitetin më prestigjioz jopublik në vend, Universitetin AAB, bëri që nga viti 2010/2011, AAB të zgjerojë veprimtarinë e vet duke hapur edhe degën në qytetin e Ferizajt. Ndërsa nga viti akademik 2011/2012, ky zgjerim përfshiu edhe qytetin e Gjakovës.

Kampusi qendror i Universitetit AAB, që tashmë ka marrë epitetin e kampusit më modern për studime në rajon, vazhdon të rritet e zgjerohet duke u pajisur në vazhdimësi edhe me teknologjinë më moderne të nevojshme për zhvillimin e aktivitetit mësimor.

Megjithatë, menaxhmenti i Universitetit AAB, ka bërë edhe një hap përpara në këtë drejtim, duke marrë vendim për ngritjen e objektve universitare edhe në dy degët e saj në Ferizaj e Gjakovë.

Në fillim të muajit mars, janë hedhur themelet e objekteve në këto dy qendra, për të siguruar objekte me hapësira të nevojshme për zhvillimin e veprimtarisë universitare.

Ky investim i Universitetit AAB, ka për qëllim sigurimin e kushteve të nevojshme si dhe ngritjen e cilësisë në procesin mësimor edhe në degët e Ferizajt e Gjakovës.

Të dashur studentë,

Ju njoftojmë se semestri veror për vitin akademik 2011/2012, në Universitetin AAB-Riinvest, për të gjitha programet e nivelit bachelor, do të fillojë të martën më 28 shkurt 2012.

Oraret e ligjëratave për këtë semestër do të publikohen të hënën, ndërsa ligjëratat fillojnë menjeherë të martën.

Universiteti AAB-Riinvest, ju dëshiron shëndet dhe suksese në studime!...

Te dashur studentë,

duke pasur parasysh se shumë nga ju nuk keni mundur të qaseni në
shërbimin e-service, ne u përpoqem të bëjmë një ndryshim që besojmë se
do të jetë në favor të shërbimeve për ju.
Ju lutemi ndiqni porcedurën në vijim, për të qenë më afër shërbimit që
është vënë në dispozicionin tuaj:

1. Për të pasur qasje në shërbimin E-service përmes web faqes zyrtare,
klikon fillimisht në linkun në vijim:
http://91.187.97.100/login.aspx

apo në rubrikën E-service në web faqe

2. Siç mund të shihni, pasi të keni klikuar në këtë link do t' ju
hapet faqja ku kërkohet hyrja juaj në shërbim.
Në fushën përdoruesi, shkruani numrin tuaj të indeksit me shkronja të
mëdha (p.sh. FEKB-0046/11)

3. Në fushën e fjalëkalimit, shkruani emrin e babait me shkronja të
vogla (p.sh. selami)

4. Hapi i fundit është të klikoni në fushën Hyrje dhe ju do të jeni
brenda shërbimit.

Ju lutemi të keni kujdes në udhëzimet për shkronja të mëdha apo të
vogla sepse një ndryshim karakteri mund t' ju paraqesë problem!

Gjithashtu, ju njoftojmë se paraqitja e provimeve për afatin e
rregullt të janarit 2011/2012 do të vazhdojë sipas parashikimeve deri
më 21 janar 2012.