Më 10.08.2010 në ambientet e Institutit Riinvest,  z. Bardhyl Dobra, student i studimeve Master në fushën e Ekonomisë Aplikative në “Université de Reims Champagne-Ardenne” (URCA) në Reims të Francës pranoi  çmimin vjetor 2010 “Ekrem Beqiri” për eseun më të mirë të shkruar nga fusha e shkencave ekonomike dhe sociale me titull “Si ndodhi kalimi nga Keynesjanismi në Neoliberalizëm”.

Çmimi “Ekrem Beqiri” është themeluar nga Instituti Riinvest me qëllim të përjetësimit të emrit dhe veprës së e Prof.Ekrem Beqirit dhe në nderim të kontributit të tij të madh në shkencën kosovare dhe posaçërisht përkushtimit të tij në zhvillimin dhe avancimin e punës së kërkimeve shkencore në Kosovë dhe në Institutin Riinvest në veçanti.  Misioni i këtij çmimi është  edhe nxitja e iniciativës, kreativitetit dhe aftësive kërkimore të studentëve.

Prof.Dr.Muhamet Mustafa, kryetar i Institutit, pasi ia dorëzoi çmimin z.Bardhyl Dobrës e inkurajoi të njëjtin që t'i përfundojë me sukses studimet e masterit dhe të doktoratës dhe të arrij   përformancë sa më të mirë shkencore e profesionale. "Kosova ka nevojë dhe hapësirë për profile të këtilla shkencore e profesionale",  theksoi prof.Mustafa me këtë rast.

"Konkursin për dhënien e shpërblimit “Ekrem Beqiri” e kam lexuar në faqen e internetit të këtij Instituti, dhe meqenëse hulumtimet e këtij instituti më kanë ndihmuar në punën shkencore dhe hulumtuese, e sidomos në punimin e temës së magjistraturës, nuk u hamenda shumë për të marr vendimin për të marrë pjesë në këtë konkurs. Ditën kur e mora lajmin se më ishte ndarë ky çmim isha  duke punuar në përgatitjen e temës së magjistraturës. U gëzova shumë për faktin që unë do të jem fituesi i parë i këtij çmimi prestigjioz që mbanë emrin e një pedagogu dhe shkencëtari të madh shqiptar" tha z.Bardhyl Dobra në fjalën e tij në ceremoninë e organizuar në institutin Riinvest me rastin e dorëzimit të këtij çmimi. "Lajmi për fitimin e këtij çmimi  ishte edhe fundi i dilemës se a do të kthehem në atdhe pas përfundimit të studimeve për të dhënë kontributin tim në ndërtimin dhe zhvillimin e tij", theksoi z.Dobra.

“Jam i impresionuar me atë që pashë”. Kështu është shprehur në fillim të fjalës së tij kryeministri i Kosovës, Hashim Thaçi, i cili sot mbajti një ligjëratë në temën “Zhvillimi ekonomik i Republikës së Kosovës” , para studentëve dhe stafit akademik të AAB-Riinvest.

“Kosova ka hyrë në fazën e fundit të mbikëqyrjes ndërkombëtare, ndërsa ekonomia e saj nga faza emergjente e pasluftës tashmë ka  kaluar në atë të zhvillimit të qëndrueshëm ekonomik, tha kryeministri Thaçi. “Ne po hyjmë në fazën e integrimit në NATO, BE dhe  Organizatën e Kombeve të Bashkuara. E gjithë kjo është përcjellë me konsolidimin dhe funksionalizimin e plotë të institucioneve të Kosovës”, theksoi Thaçi.

Ai tha se Kosova tashmë po shënon një rritje ekonomike vjetore prej 5.4 për qind, ndërsa vitet e ardhshme pritet që rritja të arrijë në 6 për qind. Politika e re fiskale, sipas kryeministrit, ka krijuar një mjedis mjaft tërheqës investues, ndërsa në anën tjetër tha se investimet kapitale do të vazhdojnë. 

“Këto norma  inkurajuese të rritjes nuk mjaftojnë. Ne duhet të arrijmë norma më të larta të rritjes për të ulur nivelin e lartë të papunësisë, e sidomos të të rinjve dhe të gjithë e dimë se  kjo rritje rezulton nga  fillimi i zbatimit të projekteve të mëdha infrastrukturore që është duke i bërë Qeveria e Kosovës”.

Sipas Thaçit, ndërtimi i autostradës është një vullnet i popullit. “Unë e kam prezantuar projektin e autostradave dhe elektorati më votoi mua, ndërsa tani unë kam këtë vullnet për të ndërtuar edhe autostradën për t'i siguruar Kosovës dalje në det”. Ai kujtoi se devijimi i trasesë së autostradës do t'i kursente vendit rreth 400 milionë euro, sepse do të shmangej hapja e disa tuneleve, ndërsa ky devijim nuk i humb udhëtarit më shumë se 6 minuta kohë.

Duke u përgjigjur në pyetjen e studentëve të AAB-Riinvest se sa është optimist kryeministri në luftën kundër korrupsionit, Thaçi tha se që 11 vjet nuk është luftuar korrupsioni dhe krimi i organizuar dhe e gjithë lufta është përqendruar tani. “E di që nuk është një betejë e lehtë, por të jeni të bindur se do të korrim sukses bashkërisht. Nuk është betejë ditore apo mujore e sezonale, është betejë jo e lehtë dhe e gjatë. Por, sundimi i ligjit duhet definitivisht të dominojë në Kosovë. Vetëm me sundimin e ligjit ne mund të ndërtojmë rend, demokraci dhe institucione funksionale”.

Kryeministri Thaçi premtoi se privatizimi do të vazhdojë, përfshirë edhe  ndërmarrjet publike, por një gjë e tillë do të kalojë nëpërmjet Kuvendit dhe do të sigurojë një zhvillim më të madh ekonomik. “Kjo është edhe arsyeja pse ne po i privatizojmë edhe asetet e shtetit, KEK-un, PTK-në dhe së fundmi, siç jeni të informuar, është përmbyllur me sukses të  plotë dhënia me koncesion e Aeroportit Ndërkombëtar të Prishtinës një kompanie prestigjioze ndërkombëtare për 20 vitet e ardhshme”.

Në pyetjen e studentëve se përse Qeveria nuk i ka marrë parasysh rekomandimet e ekspertëve ndërkombëtarë të arsimit dhe  të Këshillit Britanik që AAB-Riinvest të akreditohej që kohë më parë si universitet e jo si kolegj, Thaçi nuk dha një përgjigje konkrete. Ai tha se Kosova ka ndjekur një politikë arsimore me kritere mjaft të përparuara për sa i përket akreditimit të universiteteve private.

“Ne kemi Agjencinë e Akreditimit si asnjë vend në rajon ku punojnë ekspertë të dëshmuar ndërkombëtarë të fushës së arsimit”. Megjithatë, Thaçi theksoi se ishte vërtet i impresionuar me hapësirat mësimore dhe me punën që po bën Universiteti AAB-Riinvest.

“Mendoj se AAB-Riinvest, por dhe kolegjet e tjera, janë duke ecur për të realizuar qëllimin ku ata dëshirojnë të arrijnë. Isha i impresionuar me të arriturat e këtij kolegji dhe për këtë më lejoni t’ju përgëzoj për suksesin e arritur, më lejoni të shpreh konsideratën time të lartë për ju, për profesorët dhe në veçanti për studentët të cilët janë ardhmëria e vendit tonë”, tha kryeministri Hashim Thaçi.

Ligjëratën e kryeministrit Hashim Thaçi, mund ta lexoni të plotë këtu:


 

Të nderuar studentë, staf akademik, administrativ dhe teknik, ju informojmë se të mërkurën më 07 korrik 2010, në orën 13:00 në Universitetin AAB-Riinvest do të mbahet një ligjëratë e hapur me Kryeministrin e Kosovës, z.Hashim Thaçi. 

Ligjërata në temën “Zhvillimi ekonomik i Republikës së Kosovës”, do të zhvillohet në Amfiteatrin e madh të godinës nr.1, me fillim në orën 13.00.

Pjesëmarrja do të jetë e hapur për të gjithë të interesuarit.

Mirë se vini!

Në konferencën për shtyp të organizaur  nga Universiteti AAB-Riinvest me rastin e përfundimit të vitit akademik 2009/10,  u diskutua rreth arritjeve dhe sfidave që ka kaluar AAB-Riinvest gjatë këtij viti, për planin strategjik të Universitetit dhe gjithashtu për programet e reja të studimeve bazike, që do t’ i ofrojë në vitin e ri akademik në gjuhën angleze.

Ndër sukseset që i veçoi Rektori i AAB-Riinvest, Uros Lipuscek, ishte pranimi i Universitetit në Magna Charta Universitatum, që zyrtarisht do të nënshkruhet në muajin shtator. “Ne jemi Universiteti i parë jopublik në Kosovë që do të bëhemi pjesë e kësaj organizate që përfshinë 78 shtete me rreth 600 universitete,  tha Lipuscek. Ai gjithashtu përmendi edhe antarësimin në Alpe-Adria, shoqëri universitare  ku bëjnë pjesë univeristete të njohura nga Gjermania, Italia, Sllovenia dhe vende të tjera. 

Rritja e fondeve të bibliotekës është një sukeses i radhës i universitetit tonë. “Kemi rreth 20 mijë njësi të reja siç janë EBSCO dhe disa burime tjera që janë shumë të rëndësishme për punën tonë kërkimore” potencoi rektori i AAB-Riinvest.

Ndërkaq Muahmet Mustafa, zëvëndës kryetar i Bordit të Universitetit AAB-Riinvest, shpalosi Planin Strategjik 2010 - 2014 të Universitetit, i cili është aprovuar ditë më parë. “Synimi jonë është që të bëhemi universiteti më i mirë jo vetëm në Kosovë por edhe në rajon dhe për dallim nga universitetet tjera, ne do të njihemi si qendër e fuqishme kërkimore” theksoi z.Mustafa.

Universiteti AAB-Riinvest, në vitin e ri akademik 2010/11 do të ofrojë edhe programe të reja të studimeve në bashkëpunim me Universitetin Staffordshire. Programet e studimeve themelore do të zhvillohen në gjuhën angleze, ndërkaq e veçanta është se studenti i regjistruar në AAB–Riinvest fizikisht do të qëndrojë në Prishtinë, ndërsa do të ndjekë programet e universitetit Staffordshire që janë të autorizuara të mbahen në AAB-Riinvest.  Kjo falë marrëveshjes për franshizë të arritur me Universitetin e njohur Staffordshire nga Britania e Madhe.

“Tashmë ka përfunduar  procesi i validimit prej Universitetit Staffordshire ku ka pasur dy raunde të validimit, një në Angli dhe një në Kosovë, të cilat janë kaluar me sukses. Studentët që do t'i ndjekin këto studime do të pajisen me diplomë direkt nga Universiteti i Staffordshire”, tha Alban Hashani, drejtues i franshizë programeve të reja të studimeve.

Në fund të kësaj konference, kryetari i Bordit në AAB-Riinvest z.Ilir Tafa, falënderoi të gjithë ata që u angazhuan rreth aktiviteteve të shumta të organizuara nga universiteti AAB-Riinvest gjatë këtij viti akademik. Sipas Tafës, Universiteti AAB-RIINVEST edhe përkundër peripecive, ka kaluar një vit akademik me shumë sukses.
 

Në AAB-Riinvest qëndroi sot shefi i Zyrës Ndërlidhëse të Komisionit Evropian, z.Renzo Daviddi, i cili mbajti një prezantim para studentëve të AAB-Riinvest.
Gjatë këtij prezantimi z.Daviddi dha një strukturë të qartë të hapave të cilat duhet t’i bëjë një vend për integrim evropian. Ai tha se BE-ja nuk mund t’i vëjë kushte asnjë vendi për zgjidhjen e problemeve me fqinjtë por mund të luaj vetëm rolin e ndërmjetësuesit.

Ai gjithashtu i përmendi disa nga kriteret që duhet të aplikohen me qëllim të integrimit në BE: “Kriteret politike ku bëjnë pjesë arritja e stabilizimit të institucioneve, garancia e demokracisë, sundimi i ligjit,  të drejtat e njeriut dhe mbrojtjes së minoriteteve, si dhe kriteri ekonomik, të cilat mundësojnë rregullimin e shumë fushave të një vendi” janë ndër kriteret më të rëndësishme për  një vend që të bëhet anëtar i Bashkimit Evropian, tha Daviddi.

Sa i përket Kosovës z. Daviddi tha se ka shumë probleme përpara, por megjithatë ajo është në fillim të procesit të anëtarësimit në BE. Ai theksoi se “Institucionet e Kosovës duhet që fillimisht të luftojnë korrupsionin dhe krimin e organizuar nëse dëshirojnë të bëhen pjesë e Bashkimit Evropian”.

“Nëse ka një vendosmëri për ta luftuar korrupsionin dhe krimin e organizuar, mendoj se vetëm pjesa pozitive e kësaj do të mbetet, ndërsa ajo negative do të zhduket”, tha Renzo Daviddi.

Procesi i integrimit të Kosovës në BE

Korniza makroekonomike për rritjen ekonomike
 

Në Pallatin e Rinisë dhe Sporteve në Prishtinë, sot do të  hapet panairi i 12-të i librit “Prishtina 2010” që organizohet çdo vit nga Shoqata e Botuesve të Kosovës. 

Në panairin e sivjetmë do të marrin pjesë rreth 100 shtëpi botuese nga Kosova, Shqipëria, Maqedonia, Mali i Zi, Lugina e Preshevës dhe diaspora me rreth 1500 tituj të rinj librash. 

Ndërkaq AAB-Riinvest do të marrë pjesë me rreth 70 tituj librash nga fusha të ndryshme. Gjatë këtij panairi, AAB-Riinvest do të promovojë edhe disa libra të rinj që i ka botuar gjatë vitit të kaluar.

Për më tepër, AAB-Riinvest do të ofrojë për lexuesit 30% lirim për të gjithë librat që i ofron.

Hapjen solemne të panairit të 12-të të librit, do ta bëjë kryetari i Kuvendit të Kosovës, Jakup Krasniqi dhe Ministri për Kulturë, Rini dhe Sport, Lutfi Haziri, ndërsa një fjalë rasti do ta mbajë edhe shkrimtari, Ramiz Kelmendi.   

Panairi do të jetë i hapur nga data 7 deri më 13 Qershor 2010.

 

AAB-Riinvest botoi numrin më të ri të revistës kërkimore ndërkombëtare “Thesis Kosova” 1/2010.

Në edicionin pranveror të saj, janë botuar shkrime nga fusha të ndryshme të dijes.

Njoftojmë lexuesit e revistës “Thesis Kosova” që nurmin e ri mund ta gjenjë në librarinë “Dukagjini” në Prishtinë, si dhe në librarinë e Universitetit AAB-Riinvest.

Ndërkaq, institucionet e interesuara, mund ta marrin atë në AAB-Riinvest.
 

Në këto lëndë:

Matematikë                Biologji              Edukatë Qytetare

Gjuhë Shqipe              Gjeografi           Ekonomi dhe Ndërmarrësi

Gjuhë Angleze            Sociologji           Kimi

Fizikë                          Shkenca Kompjuterike

Kurset përgatitore nga këto lëndë do të mbahen falas për të gjithë maturantët e interesuar nga të gjitha vendbanimet e Republikës së Kosovës.

Paraqitja për kurse fillon më 26 Maj 2010 dhe zgjat deri më 29 Maj 2010.

Mbajtja e kurseve intensive fillon më 31 Maj 2010 deri më 04 Qershor 2010.

Paraqitjen për ndjekjen e kurseve mund ta bëni:

Përmes telefonit: +377 (0) 44 584 007
       
Përmes postës elektronike: kurset@aabriinvest.net

Apo drejtpërdrejt në:   Universitetin AAB-Riinvest, Zona Industriale Prishtinë-Fushë Kosovë, Objekti I, Kati II

Ndjekja e kursit parapërgatitor do të jetë një shansë më shumë për të vazhduar shkollimin tuaj universitar në cilindo nga institucionet universitare që ju dëshironi!   
 

Universiteti AAB-Riinvest sot aprovoi planin strategjik 2010-2014, konform ligjit aktual për arsim të lartë në Kosovë.

Plani strategjik paraqet një dokument sintetik, konciz që shpreh vizionin zhvillimor të AAB-Riinvest, me të cilin identifikohen të gjihë akterët e rëndësishëm të universitetit si dhe faktorët dhe burimet e rritjes së zhvillimit të tij.

Ky plan strategjik përmban arritjet e deritashme të Universitetit AAB-Riinvest, sukseset dhe sfidat lidhur me programet studimore, studentët, stafin, programet kërkimore, sisitemin e sigurimit të cilësisë, partneritetin vendor dhe ndërkombëtar si dhe qëndrueshmërinë financiare. 

AAB-Riinvest gjatë zbatimit të Planit Strategjik do të konsolidojë programet ekzistuese si dhe do të ngrisë cilësinë e studimit dhe efikasitetit të studimeve.

Pas shumë aktivitetesh të shtunën  në Universitetin AAB-Riinvest u mbajt ceremonia e përmbylljes së Manifestimit Tradicional “Ditët e AAB-Riinvest 2010”.

Mbyllja e këtij manifestimi u bë me shpërndarjen e mirënjohjeve dhe kupave për të gjithë ata që kontribuan  në këtë manifestim.

U shpërblyen edhe tre punimet më të sukesshme të studentëve për vitin akademik 2009/10. Këto shpërblime i ndau Prorektori për Çështje Mësimore në AAB-Riinvest, Rrahman Paçarizi.

Ndërkaq kupat dhe medaljet për triumfuesit e finaleve në disiplinat sportive, të mbajtura në këtë ditë,  i ndau Dekani i Fakultetit të Kulturës Fizike, Prof.Dr.Hazir Salihu.

Fitues në disiplinën e Ping-Pongut, u shpall studenti Bekim Millaku nga Fakulteti Ekonomik.

Në futboll të vogël kupën e fitoi ekipi i Fakultetit të Shkencave Kompjuterike.

Ndërkaq në disiplinën e streetball-it u shpërblyen ekipi i Fakultetit të Kriminalistikës. 

Rektori i AAB-Riinvest, Uros Lipuscek në fjalimin përmbyllës të manifestimit i kujtoi edhe një herë aktivitetet e zhvlluara gjatë kësaj jave: konferencat, debatet, aktivitetet humanitare e shumë aktivitete të tjera dhe me këtë e vlerësoi Manifestimin si shumë të sukesshëm.

Në shënimin e 15 vjetorit të Institutit Riinvest, në Konferencën “Aktivizimi i Burimeve të Rritjes Ekonomike në Kosovë” që po mbahet me këtë rast, në Universitetin AAB-Riinvest qëndroi edhe Ambasadori i Shteteve të Bashkuara të Amerikës, z. Christofer Dell.Ai tha se Kosova i mbijetoi krizës ekonomike, për faktin se ekonomia e saj e dobët nuk ka pasur shumë për të humbur.“Kosova është me fat sepse i ka ikur  furtunës ekonomike më mirë se shumica e fqinjve të saj. Por, për fat të keq, kjo nuk do të thotë se Kosova ka arsye për festë, sepse investimi kapital nuk është ngritur, për shkak të niveleve minimale të investimeve të huaja në ekonomi.

Eksportet nuk kanë shënuar rënie për shkak se ato tashmë kanë qenë  të ulëta”, tha Dell i cili shtoi se qytetarët e  Kosovës kanë treguar një aftësi të mahnitshme për të mbijetuar.

Ai ka theksuar se Kosova sipas disa vlerësimeve ka një shkallë papunësie prej 45 për qind dhe prej tyre 75 për qind janë të rinj.  

“Për të ulur papunësinë dhe për të shkuar drejt niveleve të të ardhurave evropiane, Fondi Monetar Ndërkombëtar vlerëson se Kosova duhet të ketë rritje ekonomike së paku 7 për qind në vit dhe kjo normë e rritjes të jetë ashtu për një kohë të gjatë” pohoi Dell, duke theksuar se rritja ekonomike  nuk po ndodh dhe pak biznese janë duke u krijuar, ka pak  investime të huaja dhe eksportimi në Kosovë është  në kolaps.

Kosova vazhdon të konsumojë shumë më shumë se sa prodhon, investimet janë të ulëta, papunësia e lartë, ndërsa bizneset private përballen me shumë pengesa të cilat i ndalojnë ato të arrijnë potencialin e tyre të vërtetë, theksoi Dell.  

Ai tha se një ekonomi e këtillë e pabalancuar është e paqëndrueshme për një kohë të gjatë. Është e domosdoshme që Kosova të zhvillojë një bazë të fortë ligjore ekonomike që do të mundësonte të bëhet një kandidat prosperues dhe i denjë për anëtarësim në BE. Ekziston vetëm një mënyrë për të arritur këtë. Ajo është ekonomia e lirë, jo e prangosur nga ndërhyrjet e shtetit dhe e udhëhequr  nga konkurrenca e sektorit privat që do të gjeneronte punë dhe të hyra për të gjithë qytetarët e Kosovës, tha ambasadori amerikan.

Pas reduktimit të sektorit publik dhe institucionalizimit të reformave pro-biznesore ne duhet të caktojmë disa caqe të qarta për ritje të bazuara në kompani të reja, në tregje të reja dhe në qasje të reja. Pas disa vjetësh, unë besoj se Kosova duhet të synojë të paktën të dyfishojë eksportin e saj. Duhet përpjekur të krijohen të paktën dhjetë mijë vende të reja pune në vit. Dhe duhet synuar që GDP të rritet të paktën për 7% në vit.

Unë besoj që këto qëllime janë ambicioze, por të rritshme...
Duke e krahasuar ngritjen dhe rënien e disa shteteve, si Gjeorgjinë,  Zimbabvenë etj,  Dell tha se Kosova për të ecur drejt zhvillimit ekonomik duhet të bëjë reforma.

“Hapi i parë dhe më i dukshëm nga këto është që të ndërmarrë hapa për të zgjidhur problemin e energjisë në një kohë sa më të shkurtër të mundshme, në mënyrë që përfitimet ekonomike të jenë nga një furnizim i besueshëm dhe i pastër  i energjisë elektrike”.

Ai gjithashtu tha se pret që të ketë transparencë në privatizimin e Postë-Telekomit të Kosovës.

Ndërsa, kryetari i Institutit Riinvest, Muhamet Mustafa, tha se me anë të kësaj konference do të jepet një vështrim lidhur me mënyrën se si duhet të forcohen treguesit e rritjes në Kosovë.

Kliko këtu për të shkarkuar fjalimin e përgjithshëm të Ambasadorit të Shteteve të Bashkuara të Amerikës, z. Christopher Dell

Me rastin e 15 vjetorit të themelimit të Institutit Riinvest, në Universitetin AAB-Riinvest u mbajt konferenca “Aktivizimi i burimeve të rritjes Ekonomike në Kosovë”. 

Konferenca pati objektiv të saj hulumtimin dhe prezantimin e njohurive të reja dhe eksperiencave të avancuara mbi aktivizimin e burimeve të zhvillimit ekonomik në një ekonomi në zhvillim, të hapur – me referencë speciale për rastin e Kosovës.

Gjithashtu, objektiva të Konferencës ishin edhe promovimi i aktiviteteve hulumtuese në Kosovë që kanë të bëjnë me zhvillimin ekonomik dhe shoqëror si dhe forcimi i lidhjeve dhe partneritetet me rrethet akademike dhe ekspertët e zhvillimit ekonomik në Evropë, SHBA dhe gjetiu, si dhe me organizatat ndërkombëtare.

Në Konferencë morrën pjesë emra të njohur të fushës akademike nga vendi dhe bota si dhe ekspertë ndërkombëtarë të ekonomisë e përfaqësues të institucioneve vendore dhe ndërkombëtare.
Në konferencë mori pjesë edhe ambasadori i SHBA-ve në Kosovë, z. Christopher Dell.

Në hapjen e punimeve të Konferencës, kryetari i Institutit, Prof.dr. Muhamet Mustafa tha se qeverisja e mirë dhe institucionet efektive konsiderohen faktori më i rëndësishëm i zhvillimit ekonomik. 

Për Kosovën kjo mbetet një fushë me rëndësi kritike. Institucionet tona të reja duhet të kalojnë në një proces zhvillimi por nuk ka shumë kohë për riprovime dhe mësim nga dështimet pasiqë papunësia e madhe dhe tensionet sociale bëjnë presion për përformancë më të mirë, theksoi z.Mustafa.

Kosova tani duhet të shkojë drejt rritjes së burimeve ekonomike me qëllim të arritjes së nivelit të rajonit dhe normalisht  që të arrihet kjo  duhet bërë shumë punë në shumë aspekte, tha Borko Handjiski, përfaqësuesi i Bankës Botërore, gjatë prezantimit të tij në konferencë.

Handjiski ndër të tjera shtoi se Kosova për të ngritur nivelin ekonomik duhet që t’i shfrytëzojë potencialet që ka, tokën bujqësore, popullatën më të re në rajon, minierat siç është ajo e Trepçës që dikur ishte më e madhja në Jugosllavi. 

Ken Jackson nga Universiteti i Aucklandit, foli për rëndësinë e institucioneve dhe pozitës gjeografike të një vendi duke i cilësuar si dy faktorë të rëndësishëm në zhvillimin ekonomik.

Në konferencën e sotme të ndarë në tri seksione gjithashtu u diskutua edhe për Efiçencën e Bankave në ndërmjetësim në Evropën Juglindore, me ç’rast Valentin Toçi tha se sektori financiar është më i rëndësishmi në ngritjen e  burimeve ekonomike.  Ndërkaq sektori më pak efikas në Kosovë është sektori bankar, bankat e huaja janë më efikase se ato vendore, theksoi z.Toçi.

Në pjesën e Fundit të Konferencës u diskutua rreth faktorit human, kapitali intelektual dhe migrimi që kanë poashtu rëndësinë kritike për aktivizimin e potencialeve të rritjes ekonomike.

Edukimi Arsimor është një ndër faktorët më të rëndësishëm për të vetëpunësuarit  apo punëdhënësit tha gjatë prezantimit, Besnik Krasniqi nga Universiteti i Prishtinës. Sipas tij, faktorët përcaktues të vetëpunësimit janë mosha, gjendja martesore dhe shkollimi.

Në anën tjetër, Drita Kadriu, deputete në Kuvendin e Kosovës, tha se arsimi si një ndër shtyllat më të rëndësishme për zhvillimin ekonomik, duhet të reformohet ngadalë. “Të nxënit dhe inovacioni, shkathtësitë jetësore dhe karriera, mjedisi i të nxënit, janë disa nga sfidat me të cilat përballet arsimi në Kosovë”, tha znj.Kadriu.
 

Me rastin e shënimit të 15 vjetorit të themelimit, Insituti Riinvest shpalli fituesin e shpërblimit “Profesor Ekrem Beqiri”.

Nga të gjitha punimet e arritura në bazë të konkursit publik, paneli vlerësues çmimin për punimin më të mirë ia ndau studentit Bardhyl Dobraj, nga Universiteti “Reims Champagne Ardenne”, Francë.

Tema e punimit fitues: “Si ndodhi kalimi nga Keynesjanismi në Neoliberalizëm”. 

Çmimi Ekrem Beqiri u themelua në vitin 2009 në shenjë nderimi për profesor Ekrem Beqirin , i cili ishte intelektual poliedrik i profilit të lartë sidomos në fushat shoqërore, ekonomike dhe teknike.