Misioni i Universitetit AAB-Riinvest

Misioni

Universiteti AAB është themeluar në vitin 2001 në një kohë tipike të tranzicionit të shoqërisë kosovare nga një shoqëri e izoluar për shkak të sistemit monist dhe pushtimit serb, në një shoqëri me tendenca të qarta për hapje ndaj botës dhe sistem me pluralizëm demokratik, me synime të qarta për integrime evro-atlantike.

Themelimi i Universitetit AAB pikërisht në kohën e synimeve për të ndërtuar shtetin përmes integrimit në shoqërinë moderne euro-amerikane, nuk ka qenë një koincidencë, por përgjigje ndaj nevojave të njerëzve të rinj të Kosovës për të konkurruar si të barabartë me moshatarët e tyre në tregun tashmë të hapur evropian dhe global të dijes dhe të punës.

Universiteti AAB është zhvilluar në drejtim të të qenit promotor  i vlerave dhe synimeve të shoqërisë kosovare, duke pasur synim themelor të qenit pjesë e procesit të Bolonjës, e përmes këtij procesi të jetë pjesë e Asociacionit të Universiteteve Evropiane.

Universiteti AAB përbëhet nga dy komponent: komponenti mësimor dhe komponenti shkencor.

Duke qenë pjesë e pandashme e shoqërisë dhe shtetit të Kosovës, Universiteti AAB ka zhvilluar një politikë të krijimit të një universiteti modern, që në njërën anë u përgjigjet nevojave të tregut kosovar, rajonal dhe evropian, e në anën tjetër nuk bën asnjë kompromis në dëm të cilësisë së mësimit.

Për ta përmbushur këtë mision, Universiteti AAB ka nisur bashkëpunim serioz me Universitete evropiane, të famshme për cilësinë dhe vlerat që i kanë dhënë tregut evropian dhe global të dijes dhe të punës.
 
Objektivat

-    Universiteti AAB të jetë Universiteti më cilësor në rajon
-    Universiteti AAB është i hapur për të gjithë njerëzit në shërbim të marrjes dhe dhënies së dijes
-    Universiteti AAB është Universitet që promovon diversitetin kulturor dhe kombëtar
-    Universiteti AAB prodhon kuadro të afta dhe të përgatitura për tregun e dijes dhe të punës
-    Universiteti AAB zhvillon marrëdhënie me Universitete cilësore evropiane, amerikane dhe rajonale
-    Programet shkencore te Universitetit AAB duhet ti sjellin dobi shoqerise si dhe ta ndihmojn progresin shkencore.


Vizioni

Në planin afatshkurtër, Universiteti AAB synon të zhvillojë shkallë të lartë bashkëpunimi me Universitetet evropiane me traditë të dëshmuar të cilësisë.

Në planin afatmesëm, Universiteti AAB synon të jetë pjesë e Konferencës Evropiane të Universiteteve dhe përmes cilësisë së dëshmuar ta ndihmojë shtetin e Kosovës të bëhet pjesë e Zonës Evropiane të Arsimit të Lartë.

Në planin afatgjatë, Universiteti AAB synon të jetë Universiteti privat më i madh dhe me cilësor në Evropën Juglindore.